प्रदीप अधिकारीमाथि जेनजीमार्फत मुद्दा मिलाउने प्रयासको आरोप

काठमाडौं, ३० चैत — निलम्बित नागरिक उड्डयन प्राधिकरण (क्यान) का महानिर्देशक प्रदीप अधिकारीले भ्रष्टाचार मुद्दा मिलाउन विभिन्न माध्यम प्रयोग गरेको आरोप लागेको छ। डिजिटल फरेन्सिक रिपोर्ट र अनुसन्धान सामग्रीअनुसार उनले जेनजी अभियन्तासँग सम्बन्ध जोड्न सक्ने व्यक्तिको सहायतासमेत लिएको देखिएको छ।

अख्तियार दुरुपयोग अनुसन्धान आयोगले नलिन्चोक हेलिप्याड र पोखरा अन्तर्राष्ट्रिय विमानस्थल निर्माणमा भएको भनिएको भ्रष्टाचारसम्बन्धी मुद्दामा अधिकारीविरुद्ध अनुसन्धान अघि बढाइरहेको छ। सोही क्रममा उनी मुद्दा प्रभावित पार्ने प्रयासमा संलग्न रहेको आशंका गरिएको हो।

अनुसन्धान विवरणअनुसार सुरुमा अधिकारीले आफ्नो पुरानो चिनजान र विभिन्न मध्यस्थकर्तामार्फत मुद्दा मिलाउने प्रयास गरेका थिए। ती प्रयास असफल भएपछि उनले ‘जेनजी मिलाउने’ दाबी गर्ने व्यक्तिमार्फत जेनजी अभियन्तासँग सम्पर्क स्थापित गर्ने प्रयास गरेको देखिएको फरेन्सिक रिपोर्टमा उल्लेख छ।

डिजिटल फरेन्सिक रिपोर्टमा अधिकारी र ती मध्यस्थकर्ताबीच भएको संवादसमेत फेला परेको बताइएको छ। उक्त संवादमा जेनजी अगुवासँग भेट गराउने, छिटो व्यवस्था मिलाउने र सम्बन्धित व्यक्तिहरूसँग समन्वय गर्ने विषयमा कुराकानी भएको देखिन्छ।

सोही क्रममा क्यान कार्यालयभित्र आर्थिक लेनदेनसमेत भएको अनुसन्धानले देखाएको छ। क्यानकै एक कर्मचारीमार्फत ती मध्यस्थकर्तालाई ५ लाख रुपैयाँ नगद दिइएको र सो रकम कार्यालयमै पुगेर बुझेको प्रमाण भेटिएको बताइएको छ। उक्त आर्थिक कारोबार शंकास्पद मानिएको छ, किनभने यसलाई मुद्दा प्रभावित पार्ने प्रयाससँग जोडेर हेरिएको छ।

तर, प्रदीप अधिकारीले भने सबै आरोप अस्वीकार गरेका छन्। उनले उक्त रकम आफ्नो व्यक्तिगत आम्दानीबाट खर्च गरिएको र आफ्नो विरुद्ध फैलिएको गलत समाचारको खण्डन गर्न सम्बन्धित व्यक्तिलाई काममा लगाइएको दाबी गरेका छन्। उनका अनुसार क्यानको कुनै औपचारिक निर्णयबिना व्यक्तिगत रूपमा उक्त रकम दिइएको हो।

अहिले अख्तियार लगायतका निकायहरूले मोबाइल संवाद, आर्थिक कारोबार र मध्यस्थकर्ताको भूमिकासहित सम्पूर्ण घटनाक्रमको विस्तृत अनुसन्धान जारी राखेका छन्।