३३ अर्बका मेगा परियोजनाले पोखराको मुहार फेरिँदै

पोखरा महानगरपालिकामा ३३ अर्ब रुपैयाँभन्दा बढीका ठूला विकास आयोजनाहरू सञ्चालनमा रहेका छन्। मेयर धनराज आचार्यका अनुसार विभिन्न अन्तर्राष्ट्रिय दातृ निकायहरूको सहयोगमा शहरमा ऐतिहासिक पूर्वाधार विकासका काम अघि बढाइएको छ।

प्रमुख परियोजनामा कोरियन सरकारको सहयोगमा अत्याधुनिक प्रदर्शनी केन्द्र निर्माण भइरहेको छ, जसको डिजाइन ‘घोप्टिएको डुङ्गा’ आकारमा हुनेछ र यसले पर्यटकीय आकर्षण बढाउने तथा करिब ३ हजार रोजगारी सिर्जना गर्ने अपेक्षा गरिएको छ। त्यस्तै, कोइकाको सहयोगमा जलन उपचार केन्द्र अस्पताल निर्माण हुँदैछ।

एशियाली विकास बैंकको सहयोगमा विपद् व्यवस्थापन केन्द्रको प्रक्रिया अघि बढेको छ भने पोखराका सबै ताल जोड्ने साइकल लेन, शान्ति वाटिकामा बोटानिकल गार्डेन, र पुरानो बजारलाई हेरिटेज साइटका रूपमा विकास गर्ने योजना अघि बढाइएको छ।

यसैगरी, पञ्चासे क्षेत्रमा रिसर्च सेन्टर, ‘उज्यालो पोखरा’ कार्यक्रमअन्तर्गत हाईमास्ट बत्ती जडान तथा विद्युत् तार भूमिगत गर्ने काम भइरहेको छ। विश्व बैंकको सहयोगमा विभिन्न सडक स्तरोन्नति परियोजनाले पोखरालाई आधुनिक र सुरक्षित शहरका रूपमा विकास गर्ने लक्ष्य राखिएको छ।